İtkin balıqçıların axtarışlarına helikopter cəlb olundu - YENİLƏNİB

Dekabrın 9-da Astara rayonu, Şahağac kəndi yaxınlığında Xəzər dənizində itkin düşdüyü ehtimal olunan 1999-cu il təvəllüdlü Həsənov Ağadədə Famil oğlu və 1997-ci il təvəllüdlü Həsənov Turan Eyvaz oğlunun, həmçinin sentyabrın 27-də dənizdə batdığı ehtimal olunan 1992-ci il təvəllüdlü Sultanov Tural Hüseynağa oğlunun axtarışları davam etdirilir.

Avtosfer.az xəbər verir ki, bu barədə FHN-in Mətbuat xidməti məlumat yayıb.

Axtarışlar FHN-in Aviasiya dəstəsin helikopteri, Kiçikhəcmli Gəmilərə Nəzarət və Sularda Xilasetmə Dövlət Xidmətinin, Xüsusi Riskli Xilasetmə Xidmətinin və Cənub Regional Mərkəzinin qüvvələri tərəfindən həyata keçirilir.

Əlavə məlumat veriləcək.

***13:48

Astarada Xəzər dənizinə balıq tutmağa çıxaraq itkin düşən iki balıqçının axtarışları davam etdirilir. Avtosfer.az xəbər verir ki, dekabrın 9-u səhər saat 08:00 radələrində dənizə çıxan Turan Həsənov və Ağadədə Həsənovdan həmin vaxtdan bəri xəbər yoxdur.

Hadisə ilə bağlı axtarış-xilasetmə tədbirlərinə Fövqəladə Hallar Nazirliyinə məxsus helikopter də cəlb edilib. Hazırda dəniz akvatoriyasında intensiv axtarışlar aparılır.

Qeyd edək ki, itkin düşən şəxslər qohumdurlar. Onlardan biri 1997-ci il təvəllüdlü Turan Həsənov, digəri isə 1999-cu il təvəllüdlü Ağadədə Həsənovdur.