Metroda qadına qarşı əxlaqsız hərəkətlər edən kişi - Həbs olundu

Bakı metrosunda qatarda qadına qarşı əxlaqsız hərəkətlər etmiş şəxs inzibati məsuliyyətə cəlb olunub.

Avtosfer.az qafqazinfo-ya istinadən xəbər verir ki, hadisə dekabrın 8-i metronun “Nərimanov” stansiyasında qeydə alınıb.

Gürcüstan vətəndaşı Mirvari Salmanova (ad-soyadlar şərtidir) qatardan düşərək orada xidmət aparan polislərə yaxınlaşıb. O, qatarda olarkən bir kişinin qeyri-əxlaqi rəftarına məruz qaldığını bildirib.

Qadının göstərdiyi şəxs dərhal polis əməkdaşları tərəfindən saxlanılıb. Onun Neftçala rayon sakini 46 yaşlı Şakir Mürvətov olması müəyyən edilib.

Barəsində inzibati protokol tərtib edilən vətəndaş Nərimanov məhkəməsinə göndərilib.

Məhkəmədəki iclasda iştirak edən zərərçəkmiş qadın tanımadığı şəxsin ona əxlaqsız hərəkətlər etməsi barədə ifadəsini təkrarlayıb: “Həmin şəxs əli ilə mənə toxunurdu. Əvvəlcə bunun səhvən olduğunu düşünsəm də, sonradan bu hərəkətlərin davam etdiyini hiss etdim və həmin kişinin qəsdən etdiyini anladım. Ona qışqıraraq niyə belə etdiyini soruşdum. Bu zaman stansiyada qatardan düşərək uzaqlaşmağa çalışdı. Mən də öz növbəmdə polis əməkdaşına şikayət edərək müvafiq tədbirin görülməsini xahiş etdim. Xahiş edirəm, bu şəxs cəzalandırılsın”.

Ş. Mürvətov isə ifadəsində hər hansı əxlaqsız hərəkətə yol vermədiyini deyib.

Nərimanov Rayon Məhkəməsinin qərarı ilə o, 15 sutkalıq inzibati həbs edilib.