Piyada keçidi var, amma səkiyə çıxış yoxdur - ŞİKAYƏT - VİDEO

Paytaxtın Nəsimi rayonu, Seyid Cəfər Pişəvəri küçəsində, "Memar Əcəmi" metrosunun yaxınlığında salınmış piyada keçidi vətəndaşlar üçün çətinlik yaradır.

Avtosfer.az xəbər verir ki, bu barədə izləyicilərdən biri saytın “WhatsApp” qaynar xəttinə videomaterial göndərərək məlumat verib.

Kadrlardan görünür ki, piyada keçidi ilə yolun digər tərəfinə keçən şəxslər yoldan hündür, ağaclar əkilmiş torpaq sahəsi ilə qarşılaşırlar. Bu isə fiziki məhdudiyyətli şəxslərin, uşaq arabası ilə hərəkət edən valideynlərin və yaşlıların hündürlük fərqini aşaraq səkiyə qalxmasını çətinləşdirir. Ərazidə pandusun olmaması vəziyyəti daha da mürəkkəbləşdirir.

Şikayətçinin sözlərinə görə, bəzi sürücülər də piyada keçidindən istifadə edən şəxslərə yol vermirlər. Nəticədə piyadalar üçün təhlükəli vəziyyət yaranır.

İzləyici sözügedən ərazidə piyadaların, xüsusilə də hərəkət məhdudiyyətli şəxslərin rahat və təhlükəsiz hərəkətini təmin etmək üçün müvafiq şərait yaradılmasının vacibliyini vurğulayır.

Nərmin