Psixoloq fəaliyyəti ilə bağlı AEM-dən mühüm açıqlama: Sənədlərə diqqət EDİN

Sosial şəbəkələrdə psixoloq Türkan Mehdizadə ilə bağlı müxtəlif iddiaların yer aldığı görüntülər yayılıb. 

Avtosfer.az xəbər verir ki, məsələ ilə bağlı Səhiyyə Nazirliyinin Analitik Ekspertiza Mərkəzi açıqlama verərək bildirib ki, psixoloji yardım sahəsində fəaliyyətin qanunvericiliyin tələbləri əsasında həyata keçirilməlidir.

AEM-in məlumatına görə, psixoloji yardım yalnız müvafiq ixtisas üzrə ali və ya əlavə təhsil almış şəxslər tərəfindən göstərilə bilər. Fərdi psixoloji yardımın göstərilməsi ayrıca lisenziyalaşdırılan tibbi fəaliyyət növü hesab edilmir. Bununla belə, psixoloji xidmət adı altında diaqnostika, tibbi müdaxilə və ya müalicə kimi tibbi fəaliyyət həyata keçirilərsə, müvafiq lisenziya və ya attestat tələbləri qüvvəyə minir. Mərkəz belə hallarda plandankənar nəzarət tədbirləri görə, inzibati protokol tərtib edə və zəruri olduqda materialları hüquq-mühafizə orqanlarına göndərə bilər. 

AEM həmçinin qeyd edib ki, “psixoloq” adı ilə fəaliyyət göstərmək özü-özlüyündə hüquqi status yaratmır və vətəndaşlara mütəxəssisin təhsil sənədləri və ixtisası ilə tanış olmaq tövsiyə olunur.

Fatimə