Rusiyada iri zavod VURULDU

Ukrayna Silahlı Qüvvələri avqustun 1-nə keçən gecə Rusiyanın Başqırdıstan Respublikasının paytaxtı Ufadakı "Başneft-Ufaneftexim" neft emalı zavoduna, eləcə də Krım və Ukraynanın cənubunda yerləşən bir sıra hərbi obyektlərə zərbələr endirib.
Avtosfer.az xəbər verir ki, “ASTRA” kanalı xəbər verir ki, zərbə nəticəsində Ufadakı neft emalı zavodunda yanğın başlayıb.

Bununla yanaşı, Ukrayna Silahlı Qüvvələrinin Baş Qərargahı Krım və Ukraynanın cənubunda yerləşən Rusiyanın bir sıra hərbi obyektlərinə də zərbələr endirildiyini açıqlayıb.

Bildirilib ki, əsas hədəflərdən biri Krımın Çornomorskoye qəsəbəsində yerləşən pilotsuz dəniz katerlərinin bazası olub. Ukrayna tərəfinin məlumatına görə, burada Qara dənizdə döyüş və xüsusi əməliyyatlarda istifadə olunan katerlər saxlanılır, hazırlanır və onlara texniki xidmət göstərilirdi.

Baş Qərargahın məlumatına əsasən, Çonqar yaxınlığındakı Sivaş dəmir yolu körpüsü və Vladislavovka yaxınlığındakı daha bir dəmir yolu körpüsü də vurulub. Qeyd olunub ki, bu körpülər işğal altındakı Krımla Ukraynanın cənubundakı işğal olunmuş ərazilər arasında canlı qüvvə, hərbi texnika, silah və sursatın daşınmasında istifadə olunan mühüm logistika marşrutlarıdır.

Ukrayna ordusu həmçinin Sevastopolda Rusiya Qara dəniz donanmasının radioelektron kəşfiyyat bölməsinə zərbə endirildiyini açıqlayıb.

Bundan başqa, Krımın Pervomaysk rayonunda təmir-bərpa bazası, Xerson vilayətinin işğal olunmuş hissəsində Podovoye yaxınlığında maddi-texniki təminat anbarı və Zaporojye vilayətinin Tokmak rayonu yaxınlığında pilotsuz uçuş aparatlarının saxlanıldığı anbarın da vurulduğu bildirilib