Şahin Şıxlinskinin oğlunun həbs müddəti uzadıldı

Rusiyanın Yekaterinburq şəhərindəki Azərbaycan diasporunun rəhbəri Şahin Şıxlinskinin oğlu Mutvalı Şıxlinskinin həbs müddəti uzadılıb. Avtosfer.az xəbər verir ki, bu barədə region məhkəmələrinin birləşdirilmiş mətbuat xidməti məlumat yayıb. “Yekaterinburqun Verx-İsetski rayon məhkəməsi istintaq orqanının vəsatətini təmin edərək Şıxlinski Mutvalı Şahin oğlunun barəsində seçilmiş həbs qətimkan tədbirini uzadıb. O, istintaq orqanları tərəfindən Rusiya Cinayət Məcəlləsinin 318-ci maddəsinin 1-ci hissəsi (hakimiyyət nümayəndəsinə qarşı zorakılıq tətbiqi) ilə ittiham olunur. Həbs müddəti 14 dekabr 2025-ci ilə qədər uzadılıb”, – məlumatda qeyd olunur. Xatırladaq ki, Şahin Şıxlinskinin özü də hazırda həbsdədir.