Səhər mən duranda bu xəbər olmasın - VİDEO

Amnistiya aktı qərarı ləğv edilən və özünü kosmetoloq kimi təqdim edən Elnarə Rzayeva medianı təhdid edib. Yanvar ayında Bakıda fəaliyyət göstərən “Dr. Elnara” MMC-nin rəhbəri Elnarə Ramiz qızı Rzayeva barəsində amnistiya aktı tətbiq edilmişdi.

Avtosfer.az xəbər verir ki, Ajans.az xəbər portalı olaraq bu məlumatı sosial şəbəkə hesabında və saytında paylaşmışdı. Həmin rəsmi qərarın paylaşılmasından sonra Elnarə Rzayeva tərəfindən “Siz bu xəbəri silməsəz, sabah sizin səhifənizi şikayət edib ömürlük bağlatdıracam. Sabah mən duranda bu xəbər olmasın” məzmunlu təhdid mesajı göndərilib.

Elnarə Rzayeva Cinayət Məcəlləsinin 147.1 və 148-ci maddələri ilə təqsirli bilinərək aylıq qazancının 10 faizi dövlət nəfinə tutulmaqla islah işləri cəzasına məhkum edilmişdi.

Prezident tərəfindən irəli sürülmüş təşəbbüs əsasında Milli Məclisin “Konstitusiya və Suverenlik İli” münasibətilə 19 dekabr 2025-ci il tarixli amnistiya qərarı Elnarə Rzayevaya da şamil olunmuşdu. Lakin bir müddət sonra həmin qərarda dəyişiklik edilib və Elnarə Rzayevaya tətbiq olunan amnistiya aktı ləğv olunub.
Qeyd edək ki, ötən il Bakı və Sumqayıtda fəaliyyət göstərən “LBC” estetik kosmetoloji klinikalarının idarəçiləri Rəna Rüfət qızı Soltanova və Nigar Rüfət qızı Rüfət kosmetoloq Elnarə Rzayevanı məhkəməyə veriblər. Nərimanov Rayon Məhkəməsi onun barəsində ekspertiza təyin etmişdi.

Ajans.az hazırda kosmetoloq kimi fəaliyyət göstərən Elnarə Rzayevanın lisenziyasının olub-olmaması ilə bağlı Səhiyyə Nazirliyinin Analitik Ekspertiza Mərkəzinə sorğu ünvanlayıb.

Səhiyyə Nazirliyi Analitik Ekspertiza Mərkəzindən verilən cavabda bildirilib:

“Səhiyyə Nazirliyinin “Vahid Səhiyyə İnformasiya Sistemi”ndə və Nazirliyin Analitik Ekspertiza Mərkəzinin qüvvədə olan lisenziyalara dair məlumat bazasında Rzayeva Elnarə Ramiz qızının “dermatologiya” ixtisası üzrə kosmetoloji tibbi fəaliyyətlə məşğul olmaq üçün nə müvafiq təhsilə, nə də fərdi sahibkar kimi həmin fəaliyyət növü üzrə lisenziyaya malik olması müəyyən edilməyib.”

Ajans.az onlara qarşı təhdid mesajları göndərən bu şəxslə bağlı qanuni tədbir görülməsi üçün DİN və Baş Prokurorluğa müraciət edəcəklər.