Sumqayıtda “gecə əməliyyatı” – Qanunsuzluq davam edir – VİDEO

Sumqayıt şəhərində piyada səkilərinin zəbt edilməsi problemi yenidən gündəmə gəlib və bu dəfəki hadisə sakinlərin ciddi narazılığına səbəb olub. Avtosfer.az xəbər verir ki, şəhərin mərkəzi hissələrindən biri olan Sülh prospektinin 1-ci mikrorayondan keçən hissəsində piyadaların intensiv istifadə etdiyi səki hissəsi qəfildən bağlanıb. Məlumata görə, ərazidə iri bir obyekt quraşdırılıb ki, bu da sakinlərin hərəkətini tamamilə məhdudlaşdırıb. Hadisənin ən çox şübhə doğuran məqamı isə işlərin görülmə vaxtıdır. Tikinti və quraşdırma işlərinin məhz gecə saat 01:00 ilə 03:00 aralığında, əhalinin yatdığı vaxtda sürətlə icra edilməsi sakinlərdə bu fəaliyyətin qanunsuz olduğu barədə ciddi suallar yaradıb. İnsanlar piyada yolunun bu cür “gecə əməliyyatı” ilə zəbt olunmasını qanunsuzluq kimi qiymətləndirirlər. Məsələ ilə bağlı bir neçə dəfə müxtəlif yazılar dərc edilib. Sumqayıt Şəhər İcra Hakimiyyətinə rəsmi sorğular ünvanlansa da, hər dəfə bu sorğularımız cavabsız qalıb./nocommentaz