Təkəri deşilən avtobusun sürücüsü sərnişinləri yarı yolda düşürüb uzaqlaşdı – 10-TG-801 - VİDEO

131 nömrəli marşrut xətti üzrə hərəkət edən 10 TG-801 nömrə nişanlı avtobusda sərnişinlərin ciddi narazılığına səbəb olan hadisə baş verib.

Avtosfer.az xəbər verir ki, sərnişinlərin sözlərinə görə, “General Auto Combay MMC”yə məxsus avtobusun təkəri hərəkət zamanı partlayıb, buna baxmayaraq, sürücü avtobusu sürməyə davam edib və yol boyu bütün sərnişinləri yığmağa davam edib.

Şahidlər bildirirlər ki, avtobus digər xətt üzrə hərəkət edən avtobuslarla sanki yarış halında olduğu üçün “Koroğlu” metro stansiyasına çatmadan, tam marşruta uyğun olmayan Bakı Olimpiya Stadionunun qarşısında dayanaraq sərnişinləri orada düşürüb və həmin ərazidən dərhal uzaqlaşıb.

Sərnişinlərin düşürüldükləri yer isə nə 131 nömrəli avtobusun dayanacağıdır, nə də həmin ərazidən başqa avtobuslar keçir. Nəticədə insanlar həm vaxt itirib, həm də əlavə məsafəni piyada getmək məcburiyyətində qalıblar. Bir çox sərnişin bildirir ki, hadisə baş verən an təkərin zədəli olması səbəbindən avtobusun hərəkəti təhlükəli olub və sürücü sərnişinlərin təhlükəsizliyini nəzərə almayıb.

Şikayətçilər vurğulayırlar ki, təkəri partlayan avtobusun hərəkətini davam etdirməsi həm texniki təhlükəsizlik qaydalarının pozulmasıdır, həm də sərnişinlərin həyatına real təhlükə yaradır. Onların sözlərinə görə, sürücü ya avtobusu yaxın dayanacaqda saxlamalı, ya da sərnişinlərin başqa nəqliyyat vasitəsinə yönləndirilməsini təmin etməli idi.
Sərnişinlər həmçinin qeyd edirlər ki, son zamanlar 131 nömrəli marşrut üzrə bu kimi hallar tez-tez yaşanır: avtobusların nasaz vəziyyətdə xəttə buraxılması, sürücülərin qaydalara əməl etməməsi və yolboyu digər avtobuslarla yarışması marşrutdan istifadə edənlərin narazılığını artırır.

Eltac Züflüqaroğlu