Xətai rayonunda sahibsiz itlər sakinlərə TƏHLÜKƏ YARADIR - VİDEO

Bakının Xətai rayonu, "Sevgi Parkı" deyilən ərazisində sahibsiz itlərin yaratdığı təhlükə yerli sakinlərin ciddi narahatlığına səbəb olub.

Avtosfer.az "Baku.ws"ə istinadən xəbər verir ki, "qaynar xətti"nə daxil olan məlumata əsasən, park və ətraf ərazilərdə 7-8 başdan ibarət it sürüsü mütəmadi olaraq dolaşır və bir neçə dəfə uşaqlara və böyüklərə hücum edib.

Sakinlər bildirir ki, dəfələrlə şikayət etsələr də, məsələyə heç bir qurum tərəfindən ciddi reaksiya verilməyib. Nəticədə park və ətrafında yaşayan insanlar əraziyə yaxınlaşmaqda çəkinirlər.

Şikayətçilərin sözlərinə görə, sahibsiz itlər əsasən "Sevgi Parkı"nın içində, Bakı Əyləncə Mərkəzinin yaxınlığında yerləşən, sökülən Eliza Plazanın həyətində və ətrafında görünür. Həmçinin sökülən köhnə gecəqonduların yerində salınacaq park ərazisində də bu heyvanlara rast gəlinir.

Sakinlər məsələ ilə bağlı aidiyyəti qurumlardan təhlükənin aradan qaldırılması istəyirlər.