Xəzərdə təlimlər zamanı 9 hərbçi öldü - YENİLƏNİB

Qazaxıstanın baş naziri Oljas Bektenov Xəzər dənizində hərbi təlimlər vaxtı hərbi qulluqçuların ölüm səbəblərinin araşdırılması məqsədilə hökumət komissiyasının yaradılması barədə sərəncam verib.

Avtosfer.az xəbər verir ki, bu barədə Nazirlər Kabinetinin mətbuat xidməti məlumat yayıb.

Məlumata əsasən, baş nazirin sərəncamı ilə Manqistau vilayətindəki təlimlər zamanı hərbçilərin həlak olması səbəblərini öyrənəcək hökumət komissiyasının tərkibinə müdafiə naziri, bölgənin administrasiya rəhbəri, əmək və əhalinin sosial müdafiəsi, fövqəladə hallar, səhiyyə və nəqliyyat nazirliklərinin rəhbər şəxsləri, eləcə də baş hərbi prokuror və Sərhəd Xidmətinin nümayəndələri daxil ediliblər. Bektenov baş nazirin müavini və komissiyanın sədri Qanat Bozumbayevə təcili olaraq fövqəladə hadisə yerinə yollanmağı, hərbçilərin ölüm səbəblərinin hərtərəfli araşdırılmasını təmin etməyi və həlak olanların ailələrinə dəstək göstərilməsi işlərinə dərhal başlamağı tapşırıb.

***14:18

Qazaxıstanda Xəzər dənizində təlimlər zamanı 19 hərbçini axın aparıb, onlardan 9-u ölüb.

Avtosfer.az xəbər verir ki, bu barədə Qazaxıstan Müdafiə Nazirliyi məlumat yayıb.

Bildirilib ki, hadisə sentyabrın 24-də Qazaxıstan Silahlı Qüvvələrinin Hərbi Dəniz Qüvvələrinin Xəzər dənizinin sahilində keçirdiyi təlim zamanı təlim-döyüş tapşırığının icrası zamanı qeydə alınıb.

Hadisə hava şəraitinin kəskin pisləşməsi və küləyin güclənməsi nəticəsində baş verib. İlkin məlumata əsasən, 19 hərbçidən 9-u ölüb, daha 3 hərbçi xilas edilib. Digər hərbçilərin axtarışı davam etdirilir.

Hadisə yerinə dərhal xilasetmə xidmətlərinin qüvvə və vasitələri cəlb olunub. Axtarış-xilasetmə əməliyyatında Hərbi Dəniz Qüvvələrinin bölmələri, Fövqəladə Hallar Nazirliyinin əməkdaşları, aviasiya və digər müvafiq xidmətlər iştirak edir.