Yasdan qayıdanlar "Niva" ilə selə düşdü; 5 nəfər xilas edildi - FOTO - VİDEO

İsmayıllı rayonunun Zərnava kəndindəki yas mərasimindən qayıdan 3 nəfər “Niva” markalı avtomobillə Girdiman çayını keçmək istəyərkən çətinliklə üzləşib.

Avtosfer.az xəbər verir ki, çaya qəfil gələn güclü sel səbəbindən avtomobil çayın ortasında köməksiz vəziyyətdə qalıb. Hadisə ilə bağlı gecə saat 01:57-də İsmayıllı Rayon Dövlət Yanğından Mühafizə Hissəsinə və FHN-in “101” Çağrı Xidmətinə müraciət daxil olub. Dərhal hadisə yerinə Fövqəladə Hallar Nazirliyinin 10 nəfərdən ibarət xilasedici qrupu cəlb edilib. Xilasedicilər ağır texnika və xüsusi avadanlıqlardan istifadə edərək Girdiman çayında köməksiz qalan şəxsləri təhlükəsiz əraziyə təxliyə ediblər.

Xilas olunan şəxslər:

Hüseynov Gümşüd Mərdan oğlu

Rüstəmov Ehtiram Sadıq oğlu (1968-ci il təvəllüdlü)

Əzimov Simran Eynulla oğlu (1985-ci il təvəllüdlü)

Məlumata görə, İsmayıllı rayon sakinləri olan bu şəxslər Zərnava kəndində keçirilən hüzr mərasimindən geri dönürlərmiş.

***

Girdimançayın İsmayıllıdan keçən hissəsində selə düşən 5 nəfər xilas edilib. Bu barədə Fövqəladə Hallar Nazirliyi məlumat yayıb. Qeyd edilib ki, hadisə yerində əməliyyat şəraiti qiymətləndirilərkən "Niva" markalı minik avtomobilinin çayda suyun güclü axını nəticəsində hərəkət edə bilməməsi səbəbindən vətəndaşların nəqliyyat vasitəsində köməksiz vəziyyətdə qaldığı müəyyən olunub.

Yanğınsöndürən-xilasedicilər tərəfindən həyata keçirilən operativ xilasetmə tədbirləri nəticəsində avtomobildə köməksiz vəziyyətdə qalan 5 nəfər xilas edilib.