1700-dən çox insanı öldürən göl - VİDEO

Afrikada Kamerun dövlətinin ərazisində yerləşən Nios gölü təxminən 400 il bundan əvvəl yüksək dağlıq ərazidə səth və yeraltı suların maara (Yer səthində vulkan mənşəli qıfabənzər çökəklik) dolması nəticəsində formalaşıb. Maar lavanın yeraltı sularla qarışması nəticəsində baş verən partlayışdan yaranıb. Avtosfer.az salamnews-a istinadən xəbər verir ki, gölün maksimal uzunluğu 2 km, eni 1,2 km, sahəsi 1,58 kv.km, dərinliyi isə 208 m-dir. Gölün altında böyük dərinlikdə maqma yerləşir və maqmadan fasiləsiz olaraq karbon dioksid (СО2) qazı ayrılır. Karbon dioksid torpaq süxurlarından sızaraq yuxarı qalxır və gölü qidalandıran yeraltı sularda həll olur. Məhz bu təbiət hadisəsi 1986-cı ildə dəhşətli faciənin baş verməsinə səbəb olub. Belə ki, həmin il avqustun 21-də Nios gölü 1700-dən çox insanın boğularaq ölümünə səbəb olub. Havaya qalxan karbon dioksid göldən 27 km radiusda yayılaraq canlı olan hər şeyi öldürüb. 3500-dən artıq mal-qara, ağaclardakı quşlar, həşəratlar tələf olub. Aşkarlanmış cəsədlərə baxış keçirilərkən elə təsəvvür yaranıb ki, bu insanlar, sanki, hərəkət zamanı və ya bir-biri ilə danışan zaman dünyalarını dəyişiblər. Hadisədən sonra gölün ətrafındakı ərazilərdə yaşayan 3500 nəfər başqa yerlərə köçürülüblər. Lakin gölün ətrafındakı torpaqlar məhsuldar olduğundan bir çoxları geri qayıdıb. Hazırda göl təhlükə kəsb etməkdə davam edir. Qonşu Nigeriya da bu təhlükə ilə üzləşə bilər.