Ağır qəza yenə can aldı - 2 ölü, 1 yaralı var - VİDEO

Minik avtomobilinin aşması ölümlə nəticələnib. Avtosfer.az-ın məlumatına görə, ağır qəza Zaqatalada baş verib. Rayonun Danaçı kənd sakini, 42 yaşlı İsa Nuhiyev idarə etdiyi minik avtomobili ilə Zaqatala-Qax avtomobil yolunda hərəkətdə olarkən sükana nəzarəti itirib və maşın aşıb. Avtomobildə olan sərnişin-Balakənin Katex kənd sakini, 24 yaşlı Abdulla Mamiyev hadisə yerində dünyasını dəyişib. Sürücü İsa Nuhiyev isə müxtəlif dərəcəli bədən xəsarətləri ilə Zaqatala Rayon Mərkəzi Xəstəxanasının reanimasiya şöbəsinə yerləşdirilib.

Bakı-Quba yolunda da ölümlə nəticələnən ağır yol qəzası baş verib. Hadisə magistral yolun Sumqayıtdan keçən hissəsində qeydə alınıb. Şəhər sakini, 25 yaşlı Pərviz Musazadə magistral yolu keçmək istəyərkən avtomobil onu vurub. Yaralı xəstəxanaya çatdırılsa da, həyatını xilas etmək mümkün olmayıb. Meyit müayinə edilməsi üçün Məhkəmə Tibbi Ekspertiza və Pataloji Anatomiya Birliyinin Sumqayıt şöbəsinə təhvil verilib. Hər iki faktla bağlı araşdırma aparılır.