Astarada mikroavtobus aşdı, 10-a yaxın sərnişin xəsarət aldı - YENİLƏNİB

Astara rayonunun Deqədi kəndi ərazisində baş vermiş yol-nəqliyyat hadisəsi səbəbi ilə xəsarət alan 12 nəfər (6 kişi, 6 qadın) noyabrın 11-də, saat 09:40-da Astara Rayon Mərkəzi Xəstəxanasının Təcili yardım şöbəsinə hospitalizasiya olunub.

Avtosfer.az xəbər verir ki, bu barədə Oxu.Az-a Tibbi Ərazi Bölmələrini İdarəetmə Birliyindən (TƏBİB) məlumat verilib.

Qeyd olunub ki, onlara bədənin müxtəlif nahiyələrinin travmaları diaqnozları təyin olunub.

"Vəziyyətləri qənaətbəxş qiymətləndirilən şəxslər ambulator müalicə üçün evə buraxılıblar. 4 nəfər isə (3 kişi, 1 qadın) Lənkəran Rayon Mərkəzi Xəstəxanasının Təcili yardım şöbəsinə hospitalizasiya olunub. Onlara bədənin müxtəlif nahiyələrinin travmaları və sınıqları diaqnozları təyin olunub. 2 nəfərin müalicəsi tibb müəssisəsində davam etdirilir, vəziyyətləri qənaətbəxş qiymətləndirilir. İki nəfər isə ambulator müalicə üçün evə buraxılıb", - məlumatda deyilir.

***

Astarada mikroavtobus qəzasında xəsarət alanlar xəstəxanadan evə buraxılıblar.

Avtosfer.az oxu.az-a istinadən xəbər verir ki, yol-nəqliyyat hadisəsi baş verdikdən sonra xəsarət alanların 4 nəfəri Lənkəran Rayon Mərkəzi Xəstəxanasına, digər 12 nəfər isə Astara Rayon Mərkəzi Xəstəxanasına aparılıblar.

Zərərçəkənlərə ilkin tibbi yardım göstərildikdən sonra hamısı ambulator müalicə üçün evə buraxılıblar.

Faktla bağlı araşdırma aparılır.

***11 noyabr, 12:48

Astara rayonunda sərnişin mikroavtobusunun aşması nəticəsində xəsarət alanlardan 6 nəfər xəstəxanaya yerləşdirilib.

Avtosfer.az oxu.az-a istinadən xəbər verir ki, hadisə nəticəsində 10-dan artıq sərnişinə ilkin tibbi yardım göstərilib. Onlardan dörd nəfər Lənkəran Rayon Mərkəzi Xəstəxanasına, ikisi Astara Rayon Mərkəzi Xəstəxanasına hospitalizasiya olunub. Hazırda xəsarət alanların müayinəsi davam etdirilir.

***

Astara rayonunda mikroavtobusun aşması nəticəsində 10-a yaxın sərnişin xəsarət alıb.

Avtosfer.az report-a istinadən xəbər verir ki, hadisə rayonun Deqədi kəndində baş verib.

Kijəbə-Deqədi marşurutu üzrə hərəkət edən mikroavtobus Astara istiqamətində hərəkətdə olarkən idarəetməni itirib və yoldan çıxaraq aşıb.

İlkin məlumata əsasən, mikroavtobusda olan 20-yə yaxın sərnişindən təxminən 10-u müxtəlif dərəcəli xəsarətlər alaraq Astara və Lənkəran Rayon Mərkəzi xəstəxanalarına çatdırılıblar. Yaralılara zəruri ilkin tibbi xidmətlər göstərilir.

Faktla bağlı araşdırma aparılır.