Bakıda nasaz avtomobil zəncirvari qəzaya səbəb oldu: Yaralılar var - FOTO

Bakının Ziya Bünyadov prospektində 4 avtomobilin iştirakı ilə zəncirvari yol-nəqliyyat hadisəsi baş verib.

Avtosfer.az APA-ya istinadla xəbər verir ki, prospektdə hərəkətdə olan VAZ-2107 markalı avtomobil texniki nasazlıq səbəbindən qəfil dayanıb. Bu zaman eyni markalı digər avtomobilin sürücüsü nasaz nəqliyyat vasitəsinin qarşısında dayanaraq ona kömək etmək istəyib.

Bu vaxt arxadan gələn “Opel” markalı avtomobil yolda dayanmış VAZ-2107-yə çırpılıb. Ardınca eyni istiqamətdə hərəkət edən BYD markalı avtomobil də “Opel”lə toqquşub.

Nəticədə 4 avtomobilin iştirakı ilə zəncirvari qəza baş verib.

Hadisə zamanı iki sürücü xəsarət alıb. Yaralılar təcili tibbi yardım avtomobilləri ilə xəstəxanaya çatdırılıblar.

Qəza səbəbindən prospektdə nəqliyyat sıxlığı yaranıb. Hadisə yerinə polis əməkdaşları cəlb olunub, qəzaya uğrayan avtomobillərin yoldan kənarlaşdırılması istiqamətində işlər aparılır.

Faktla bağlı araşdırma aparılır.