Bir sürücünün səhvi neçə insanın həyatını təhlükəyə atır? - Rövşən Tağıyev

Balakən rayonunda dörd nəfərin ölümü ilə nəticələnən ağır yol-nəqliyyat hadisəsi yol hərəkəti iştirakçılarının məsuliyyəti məsələsini yenidən gündəmə gətirib.

Avtosfer.az xəbər verir ki, Baş Dövlət Yol Polisi İdarəsinin şöbə rəisi Rövşən Tağıyev yol hərəkəti qaydalarına əməl etməyin hər bir hərəkət iştirakçısının üzərinə düşən hüquqi və mənəvi məsuliyyət olduğunu bildirib.

O qeyd edib ki, bəzi sürücülər təhlükəli sürəti, riskli ötməni və digər qayda pozuntularını yalnız özlərinə aid qərar kimi qəbul edir və bununla yaratdıqları təhlükənin miqyasını nəzərə almırlar:

“Halbuki ümumi istifadədə olan yollarda verilən yanlış qərarın nəticəsi heç vaxt yalnız həmin sürücü ilə məhdudlaşmır. Bir sürücünün məsuliyyətsiz davranışı qaydalara riayət edərək öz yolu ilə hərəkət edən insanların həyat və sağlamlığını da təhlükə altına qoyur”.

Rövşən Tağıyev vurğulayıb ki, yol hərəkətində hər bir sürücü öz davranışının mümkün nəticələrini nəzərə almalı, digər insanların həyat və sağlamlığına təhlükə yarada biləcək hərəkətlərdən çəkinməlidir.

Eltac