Gürcüstan-Azərbaycan sərhədi yaxınlığında Türkiyə təyyarəsinin qəzası ilə bağlı YENİ MƏLUMAT

Gürcüstan-Azərbaycan sərhədi yaxınlığında Türkiyəyə məxsus C-130 hərbi yük təyyarəsinin qəzaya uğramasında heç bir xarici müdaxilə və ya partlayıcı maddə izi aşkar edilməyib.

Avtosfer.az xəbər verir ki, bu barədə "Anadolu Ajansı" məlumat verib.

Bildirilib ki, Ankara Baş Prokurorluğu, Hərbi Cinayətlərin İstintaq Bürosu 11 noyabr 2025-ci ildə Gürcüstanın Kaxeti bölgəsində qəzaya uğrayan və 20 əsgərin ölümünə səbəb olan Hərbi Hava Qüvvələri Komandanlığına məxsus "68-1609" nömrəli C-130 təyyarəsi ilə bağlı araşdırmanı davam etdirir.

"Qəza yerindən dəlillərin toplanması, qalıqların müayinəsi və şahid ifadələrinin alınmasını əhatə edən istintaqda beynəlxalq prosedurlara əməl edilib. İkitərəfli müqavilələrə uyğun olaraq, Gürcüstan hakimiyyəti ilə koordinasiya sübutların Türkiyəyə tam və dəqiq çatdırılmasını təmin edib.

Təyyarənin yaxınlığında hər hansı bir sursatın qəlpə izləri və ya zədə izləri tapılmayıb. Kustar üsullu və ya hər hansı digər bir partlayıcı qurğu, onun komponentlərindən qaynaqlanan partlayış izləri tapılmayıb", - deyə hesabatda bildirilib.

Sənəddə həmçinin neft törəmələrinin və ya yanğını sürətləndirən maddələrin və şübhəli kimyəvi maddələrin aşkarlanmadığı qeyd olunub.