Qaradağda zəncirvari qəza: 4 maşın bir-birinə girdi - VİDEO

Qaradağ rayonunda zəncirvari yol-nəqliyyat hadisəsi baş verib.

Avtosfer.az-ın sorğusuna cavab olaraq Baş Dövlət Yol Polisi İdarəsindən bildirilib ki, qəza oktyabrın 20-də saat 07:45 radələrində Bakı–Qazax–Gürcüstan sərhədi avtomobil yolunun Qaradağ rayonu, Səngəçal qəsəbəsi ərazisindən keçən 45-ci kilometrliyində qeydə alınıb.

Belə ki, E.Şabanovun idarə etdiyi 77-MR-517 dövlət qeydiyyat nişanlı “Hyundai Santa-Fe” markalı avtomobil Qazax istiqamətində hərəkətdə olarkən qarşısında dayanmış Ə.İmanovun idarə etdiyi 88-BN-990 dövlət qeydiyyat nişanlı “Hyundai” markalı avtomobilə çırpılıb.

Zərbənin təsirindən Ə.İmanovun idarə etdiyi avtomobil qarşıda dayanmış Ə.Məmmədovun idarə etdiyi 57-CM-249 dövlət qeydiyyat nişanlı “Kia Rio” markalı avtomobillə, daha sonra isə E.Bağırovun idarə etdiyi 99-XA-656 dövlət qeydiyyat nişanlı “DAF” markalı yük maşını ilə toqquşub.

Hadisə nəticəsində “Hyundai”ın sürücüsü Ə.İmanov yüngül xəsarət alıb, nəqliyyat vasitələrinə maddi ziyan dəyib.

Hadisə yerinə yol-patrul xidməti əməkdaşları cəlb olunub. Hazırda qəza baş verən ərazidə nəqliyyat vasitələrinin sərbəst və təhlükəsiz hərəkəti təmin edilib.

Faktla bağlı araşdırma aparılır.

Nərmin