Sükanın kilidlənməsinə görə qadın sürücü ağır qəzaya düşdü - FOTO - VİDEO

“Lada Vesta” avtomobillərinin sükanının hərəkət zamanı kilidlənməsi artıq üçüncü qəzaya səbəb olub. 

Avtosfer.az xəbər verir ki, hər 3 qəza Rusiyada baş verib. Əvvəlki 2 qəzada sürücülər aşağı sürətə görə qəzadan yayına bilmişdilər. Bu dəfə Vladimir vilayətində yüksək sürətlə gedən “Vesta”nın sükan bloklandığı üçün maşın yoldan çıxaraq aşıb. Sürücü qadının onurğası ciddi şəkildə zədələnib.

Faktı polis araşdırır. 

Qeyri-rəsmi məlumata görə (yerli televiziyaların xəbəri) avtomobilin sükanı kilidləndiyi üçün maşın yoldan çıxaraq 3 dəfə yuvarlanıb. Qəza zamanı hava yastıqları açılmayıb, “Glonass” xəbərdarlıq sistemi işə düşməyib.

Müstəqil ekspertlərin qənaətinə görə, yeni model VAZ avtomobillərində sükanın kilidlənməsi probleminə yerli proqram təminatı olan maşınlarda rast gəlinir. Bu da göstərir ki, “idxalın əvəzlənməsi” prosesi normal getmir.

Hava yastıqlarının açılmamasına 2 səbəb ola bilər: ya sürücü kəmər taxmayıb, ya da proqram təminatı və kalibrləmə doğru deyil. 

Qeyd edək ki, sükan bloklanması məsələsinə görə Avtovaz avqustda kütləvi geriçağırma kampaniyası keçirib. Kampaniya çərçivəsində sükanın proqram təminatı dəyişdirilib.

Vüqar Yaşaroğlu