Fernando Alonso: "Maksimum xal toplamaq üçün əlimizdən gələni edəcəyik”

“Bakıdakı ötənilki yarış bizim üçün unudulmaz oldu. Bu, dəlisov bir Qran-pri idi”. “Report”un məlumatına görə, bunu “McLaren” pilotu Fernando Alonso “Formula-1”in rəsmi saytına Azərbaycan Qran-prisi haqqında danışarkən deyib. 37 yaşlı ispaniyalı sürücü bildirib ki, Azərbaycan Qran-prisi “Formula-1” təqvimində yeni olsa da, Bakı Şəhər Halqası pilotlar arasında əla trek kimi tanınır: “Bu, ilin ən sürətli və uzun şəhər trekidir. Ona görə də maşınlar və pilotlar üçün çətindir. Amma bu, yarışın tərkib hissəsidir. Bakıdakı çıxışımızda radikal dəyişiklik gözləmirik. Buna rəğmən, hər yarışda bolidimiz barədə nəsə öyrənirik. Azərbaycan Qran-prisində maksimum xal toplamaq üçün əlimizdən gələni edəcəyik”. Alonso 2016-cı ildə Azərbaycanda keçirilən Avropa Qran-prisinin səfiri olub. 2005 və 2006-cı illərdə dünya çempionu olmuş pilot ötən il Bakı mərhələsini 9-cu yerdə başa vurub. Qeyd edək ki, “Formula-1” üzrə Azərbaycan Qran-prisi aprelin 27–29-da keçiriləcək.