Sumqayıtda dayanacaqların yaxınlığında yol nişanı quraşdırılmayıb - VİDEO

Sumqayıt şəhərinin nəqliyyat sistemindəki çatışmazlıqlar artıq şəhər camaatının da ciddi narazılığına səbəb olur.

Avtosfer.az-ın sosial şəbəkə hesabına daxil olan şikayətdə vətəndaş bildirir ki, şəhərin əksər ərazilərində dayanacaq problemi yaşanır. Avtobusların dayandığı bir sıra ərazilərdə pavilyonlar təşkil edilməyib. Mövcud olan dayanacaqların isə yaxın həndəvərində yol nişanı quraşdırılmayıb.

Bu da özü ilə zəncirvari bir sıra problemlərə səbəb olur. Belə ki, yol nişanı olmayan və qarşısında ziqzaq xətlər olmayan pavilyonlar kənardan sadəcə satış köşkü fəaliyyəti göstərən obyekt kimi görünür. Ona görə də sürücülər dayanacağın qarşısında və yaxınlığında avtomobil saxlamaqdan çəkinmirlər.

Nəticədə, onsuz da normal fəaliyyət göstərməkdə çətinlik çəkən avtobus sürücüləri də nəqliyyat vasitələrini 2-ci cərgədə saxlayıb sərnişin mindirib-düşürməli olur. Vətəndaş bildirir ki, şəhərin əksər dayanacaqlarında vəziyyət eynidir. Yalnız mərkəzi küçələrdə bir neçə dayanacağın yaxınlığında nişan qoyulub.

Səfər