Sürücülər üçün "tapmacaya" çevrilən yol: Ciddi nöqsanlar var - VİDEO

Paytaxtın Qaradağ rayonunda yol hərəkətinin təşkilindəki uyğunsuzluqlar sürücülərdə ciddi çaşqınlıq yaradır. Söhbət "Qobu Park" yaşayış kompleksinin yaxınlığında yerləşən dairədən gedir. Avtosfer.az-ın məlumatına görə, dairəyə yaxınlaşan zaman 4.3 nişanı quraşdırılsa da, ayırıcı zolaq üzərində maneəni sağdan keçməni bildirən nişan quraşdırılmayıb.

Dairəyə daxil olduqdan sonra onu sağa doğru tərk edən istiqamətdə asfalt üzərində "yol ver" nişanlaması çəkilsə də, faktiki olaraq burada heç kimə yol vermə zərurəti yoxdur. Bu isə sürücülər arasında çaşqınlıq yaradır. Eyni zamanda, dairəni sola doğru tərk edən sürücülər üçün asfalt üzərindəki "yol ver" nişanlanması düzgün tətbiq olunsa da, bunu bildirən 2.4 nişanı ümumiyyətlə quraşdırılmayıb.

Qeyd edək ki, asfalt üzərindəki "yol ver" nişanlanması 2.4 nişanı ilə birgə tətbiq edilməlidir.

Ümid edirik ki, aidiyyəti qurumlar bu uyğunsuzluqları tezliklə aradan qaldıracaq və yol hərəkətinin təhlükəsizliyini təmin edəcəklər.

Fərid