Svetoforlarda velosiped bölməsi – Polis cərimə yazmadıqca qayda pozanlar çoxalır - VİDEO

Bakıda velosiped və kiçik elektrik nəqliyyat vasitələrini idarə edənlərin təhlükəsizliyini gücləndirmək məqsədilə şəhərin 47 yolayrıcında mövcud svetoforlara 115 ədəd velosiped bölməsi quraşdırılıb və istifadəyə verilib. Bu, həm sürücülər, həm də piyadalar üçün hərəkətin daha nizamlı və təhlükəsiz olmasına imkan yaradır.

Nəqliyyat eksperti Elməddin Muradlı Avtosfer.az-a açıqlamasında bildirib ki, bu addım vacib və zəruridir:

“Hər bir hərəkət iştirakçısının yollarda davranışının düzgün tənzimlənməsi həyati əhəmiyyət daşıyır. Əgər skuter sürəni, velosipedçini, moped sürəni, həmçinin, piyadaları sərbəst buraxsaq yolda xaos yaranır. Yeni bölmələr vasitəsilə hər kəs üçün ayrıca zolaq və hərəkət hissəsi müəyyən edilibsə, bu sahələrdə hərəkət mütləq qaydalara uyğun tənzimlənməlidir. Yəni avtomobilə nisbətdə üstünlük hər zaman yalnız velosipedə verilməməli, skuter və mopedlərlə qarşılıqlı balans qorunmalıdır. Piyadalar üçün də eyni prinsip keçərlidir”.

Bu səhvi təkrarlayan sürücülər qəzadan qaça bilmir – Mütəxəssisdən TÖVSİYƏ - VİDEO

Ekspert əlavə edib ki, quraşdırılmış qurğuların istifadəsi hələ də ciddi nəzarət tələb edir:

“Məsələn, skuter sürənlər qırmızı işıqda keçirlər, sağa-sola baxaraq yolu boş görən kimi svetofora fikir vermədən hərəkət edirlər. Onların məsuliyyəti var, amma praktikada nə yol polisi, nə post-patrul xidməti onları cərimələyir. Ona görə də sürücülər qaydaları pozmağa davam edirlər. Əvvəllər mopedçilərə dəfələrlə xəbərdarlıq olunub ki, zolaqlara riayət etsinlər, səkidə sürməsinlər, piyadalara təhlükə yaratmasınlar. Amma söz eşitmədilər. Nəticədə sərt cəzalar tətbiq olundu. İndi moped sürücülərinə sürücülük vəsiqəsi tələb olunur, mopedin qeydiyyatı və dövlət nişanı qanunla müəyyən edilib, hətta avtoxuliqanlıq maddəsi ilə həbs edilə bilərlər”.

Elməddin Muradlı vurğulayıb ki, son dövrlərdə skuterlərlə bağlı qəzalar, hətta ölüm hadisələri artıb: “Xüsusən, yeniyetmələr və gənclər həyatını itirir. Yollarda hərəkəti tənzimləmək üçün xüsusi texniki vasitələr dövlətin milyonlarla vəsaiti hesabına təmin olunur, insanların həyat və sağlamlığı üçün tətbiq edilir, amma qaydalara əməl olunmadıqda bütün səylər boşa çıxır. Diqqətli olmaq lazımdır."

Eltac Zülfüqaroğlu