Yolun təşkili biabırçı durumdadır: Keçidin yanında “özbaşına dayanacaq” yaradılıb - VİDEO

Paytaxtın Sabunçu rayonu, Yeni Ramana qəsəbəsinin Şuşa şəhərciyində yolun təşkili ilə bağlı ciddi problem müşahidə olunur.

Kanalizasiya lyukunun qapağı oğurlandı, qurum həmin gecə təmin etdi - VİDEO

İzləyicilərdən biri bununla əlaqədar Avtosfer.az-ın “Instagram” ünvanına foto və video göndərərək vəziyyət barədə ətraflı məlumat verib.

Şikayətçinin sözlərinə görə, ərazidə dayanacaq nişanı ümumiyyətlə yoxdur, lakin avtobuslar piyada keçidinə bir neçə addımlıq məsafədə dayanaraq sərnişin mindirib-düşürür. O bildirib ki, sürücülər özləri üçün qanunsuz “dayanacaq” müəyyən ediblər: “Avtobus sürücüsünə yaxınlaşıb soruşdum ki, bu sizin qanuni dayanacağınızdırmı? Elədirsə nişan hanı? O isə “yox, özümüz dayanırıq’” cavabını verdi”.

İzləyici qeyd edib ki, yolun birtərəfli və ya ikitərəfli olması belə dəqiq bilinmir. Avtobuslar dayanacaq kimi istifadə etdikləri zolağı tam tutduqları üçün eyni istiqamətdə hərəkət edən avtomobillər məcburən əks yola çıxırlar. Bu isə həm sürücülər, həm də piyadalar üçün ciddi təhlükə yaradır.

Şikayətçi əlavə edib ki, yolun qarşı tərəfində məktəb yerləşməsinə baxmayaraq, ərazidə “Diqqət, uşaq var” nişanı belə quraşdırılmayıb: “Avtobusun önündən keçib övladımı məktəbə aparanda eyni istiqamətdən gələn avtomobili görmədik, az qala bizi vuracaqdı. Çünki avtobus demək olar ki, piyada keçidinin üzərində dayanır və digər zolaqdan gələn maşınlar görünmür. Onlar da piyadanı görmədiyi üçün vaxtında tormozlaya bilmir.”

O, məsələ ilə bağlı DYP və AYNA-ya müraciət etdiklərini, lakin hələ də heç bir tədbir görülmədiyini vurğulayıb.

Nərmin