DYP əməkdaşları tələbələrlə görüşdü - VİDEO

Gəncədə tələbələrlə yol hərəkəti təhlükəsizliyi mövzusunda maarifləndirici görüş keçirilib.

Baş Dövlət Yol Polisi İdarəsinin təşkilatçılığı ilə təhsil müəssisələrində keçirilən maarifləndirmə tədbirləri davam etdirilir. Bu çərçivədə Gəncə şəhər Dövlət Yol Polisi xidmətinin əməkdaşları Azərbaycan Dövlət Aqrar Universitetinin tələbələri ilə görüş keçiriblər.

Avtosfer.az xəbər verir ki, görüş zamanı tələbələrə yol hərəkəti qaydaları ilə bağlı zəruri tövsiyələr verilib, yol-nəqliyyat hadisələrinin qarşısının alınmasında qaydalara əməl etməyin vacibliyi diqqətə çatdırılıb. Bildirilib ki, yol hərəkəti təhlükəsizliyinin təbliği istiqamətində təhsilalanlar arasında aparılan maarifləndirmə işləri hər zaman müsbət nəticələr verir və bu sahədə təhsil ictimaiyyəti ilə qarşılıqlı əməkdaşlıq xüsusi əhəmiyyət daşıyır.

Tələbələrin aktiv iştirakı ilə keçən görüşdə onları maraqlandıran suallar cavablandırılıb. Tədbirin sonunda gənclər şəxsi nümunələri ilə yol hərəkəti təhlükəsizliyinin təbliğinə töhfə verməyə çağırılıblar.