Britaniya kralının avtomobili satışa çıxarılacaq - FOTO

Britaniyanın "H&H Classic" şirkəti dekabrın əvvəlində 2013-cü ildə istehsal olunmuş "Bentley Mulsanne" sedanını hərraca çıxaracaq.

Avtosfer.az şirkətin saytına istinadən xəbər verir ki, avtomobilin ilk sahibi hazırda Böyük Britaniya Kralı III Çarlz kimi tanınan, ozamankı Uels Şahzadəsi Çarlz olub. Nəqliyyat vasitəsi 2017-ci ilə qədər onun ixtiyarında idi.

Limuzinin 80-100 min funt sterlinq (105-131 min ABŞ dolları) arasında qiymətə satılacağı gözlənilir.

"Mulsanne" 55 000 kilometrdən bir qədər çox yol qət edib. Sedan 513 at gücünə malik 6.75 litrlik V8 mühərriki, səkkiz pilləli avtomatik transmissiya və dartıcı arxa təkərlər sistemi ilə təchiz olunub. O, 100 km/saat sürətə 5.3 saniyəyə çata bilir. "Mulsanne" dəri və qoz ağacından hazırlanmış interyer, elektrikli oturacaqlar, televizor və naviqasiya sistemi, eləcə də hava asqısı və 21 düymlük təkərlərlə təchiz olunub.