Qızdırılan təhlükəsizlik kəmərləri belə işləyir - FOTO

Qızdırılan sükan və oturacaqlar artıq heç kimə təəccüblü gəlmir. İndi isə qızdırılan təhlükəsizlik kəmərləri hazırlanır.

Avtosfer.az xəbər verir ki, daxiliyanma mühərrikli avtomobillərdə salonun qızdırılması asandır. Bu mühərriklərin hasil etdiyi istiliyin kiçik bir qismini salona yönləndirərək məsələni həll etmək mümkündür. 

Lakin elektromobillərdə salonun qızdırılması ciddi problemdir. Qışda batareya sürətlə boşaldığı üçün elektromobil sürücüləri 50-ci illərin sovet sürücüləri kimi kürklə oturmağa məcburdurlar. Çarəsini isə alman mühəndislər tapıb.
ZF şirkəti qızdırılan təhlükəsizlik kəmərləri hazırlayıb. Bu kəmər sürücü və sərnişinin sinə və qarın hissəsini qızdırdığı üçün salonda yüksək temperatur yaratmağa lüzum qalmır. Test sürüşləri göstərib ki, bu kəmərlər sayəsində batareyanın sərfiyyatını 6-15 faiz azaltmaq mümkündür. 

Qızdırılan kəmərin quruluşu adi kəmərdən çox da fərqlənmir. Qızrırıcı element 4 nazik naqildən ibarətdir. Elektrik sərfiyyatı isə 20-60 vatt arasında dəyişir. Yəni, bir müasir smartfon qədər.

Bundan əlavə, kəmərdə temperaturun əllə tənzimlənməsinə ehtiyac yoxdur. Detektorlar salondakı temperaturdan asılı olaraq rejimi özləri seçir.

Vüqar Yaşaroğlu