Təzə “Toyota”ların yarı qiymətə satılmasının SƏBƏBİ - FOTO

Rusiyanın Uzaq Şərq regionunda təzə “Toyota Corolla Cross” avtomobilləri 2,3 milyon rubla (təxminən 48 000 manat) satılır. 2 litrlik mühərriklə təchiz edilmiş avtomobillərin federasiyada real qiyməti bundan təxminən 2 dəfə çoxdur. Bəs bu ucuzluğun səbəbi nədir?

Avtosfer.az xəbər verir ki, səbəb avtomobillərin Çin istehsalı olmasıdır. Söhbət 2024-cü ilədək istehsal edilmiş, anbarda qalan modellərdən gedir. Utilizasiya rüsumu və gömrük xərci az olsun deyə avtomobillər fiziki şəxslər tərəfindən gətirilir. 

Daha vacib məqam avtomobillərin zəmanətinin olmaması və servislə bağlı problemlərdir. Bir sözlə, vəziyyət Azərbaycandakından fərqli deyil. Avtomobillər sırf Çin bazarı üçün istehsal edildiyindən bütün servis təmimatları və proqram təminatı Çin dilindədir. Maşınların komplektasiyası Avropa modellərindən ciddi şəkildə fərqlənir. 

İlk aylarda hər şey qaydasında gedir. Bir müddət istismardan sonra texniki qulluq tələb edildikdə isə çətinliklər (servis yoxdur, detal tapılmır, diaqnostika mümkün deyil və s.) üzə çıxır. Burada yenə də itirən tərəf  avtomobilin sahibi olur.

Vüqar Yaşaroğlu