Maşın alverində yeni fırıldaq; radiatora yağ töküb qiyməti endirmək istədilər - VİDEO

Türkiyənin İstanbul şəhərində avtomobil alqı-satqısı zamanı yeni dələduzluq üsulu üzə çıxıb. 

Avtosfer.az xəbər verir ki, özlərini alıcı kimi təqdim edən şəxslər satıcını aldatmaq üçün avtomobilin radiatoruna gizlicə yağ tökərək, “maşınınıza yağla su qarışıb” bəhanəsi ilə qiyməti aşağı salmağa çalışıblar.

Hadisə ikinci əl avtomobil satış məntəqəsində baş verib. Görüntülərdə şəxslərdən birinin satıcı ilə söhbət etdiyi, digərinin isə fürsətdən istifadə edərək radiatorun qapağını açıb içinə yağ tökdüyü açıq-aydın görünür. Daha sonra onlar avtomobilin nasaz olduğunu iddia edərək qiymətdə endirim tələb ediblər.

Fırıldaqçılıq cəhdi məkanın təhlükəsizlik kameraları tərəfindən qeydə alınıb. Sözügedən görüntülər sosial şəbəkələrdə paylaşıldıqdan sonra geniş müzakirələrə səbəb olub.

İstifadəçilər bu üsulu ciddi təhlükə adlandıraraq, həm alıcıların, həm də satıcıların belə hallara qarşı daha diqqətli olmasını tövsiyə ediblər. Mütəxəssislər də bildirirlər ki, avtomobil alqı-satqısı zamanı mütləq peşəkar ustaların rəyinə müraciət edilməli, hər hansı şübhəli hərəkətə qarşı dərhal reaksiya verilməlidir.

Eltac Zülfüqaroğlu