ABŞ-də bu avtomobillər 85 qəpikdən hərraca çıxarıldı – MARAQLI

ABŞ-də klassik avtomobil həvəskarlarının böyük maraqla gözlədiyi hərracda nadir avtomobillər cəmi 50 sentdən, yəni təxminən 0,85 manatdan başlayan qiymətlərlə satışa çıxarılacaq.

Avosfer.az xəbər verir ki, ABŞ-nin Kolorado ştatında keçiriləcək hərracda üç nəsildir avtomobil toplayan Born ailəsinə məxsus böyük kolleksiyadan təxminən 300 klassik avtomobil, pikap, modifikasiya edilmiş nəqliyyat vasitəsi və nadir avtomobil eksponatı satışa təqdim olunacaq.

İllərlə aparılan axtarışlar nəticəsində formalaşdırılan kolleksiyada tam bərpa edilmiş və istifadəyə hazır klassik avtomobillərlə yanaşı, restavrasiya həvəskarlarının maraq göstərə biləcəyi çoxsaylı layihə avtomobilləri də yer alır.

Hərraca çıxarılacaq avtomobillər arasında 1912-ci il istehsalı “Ford Model T”, 1955-ci il “Chevrolet NAPCO” pikap, 1957-ci il “Pontiac Super Chief” və müxtəlif “Dodge” universal modelləri var.

Bəzi avtomobillərin ilkin qiymətinin cəmi 50 sent olması böyük fürsət kimi görünsə də, təklif savaşları nəticəsində onların yekun satış qiymətlərinin əhəmiyyətli dərəcədə yüksələcəyi gözlənilir.

Hərracda onlayn iştirak da mümkün olacaq. Salonda iştirak edən alıcılardan satış qiymətinə əlavə olaraq 8 faiz, internet üzərindən təklif verənlərdən isə 10 faiz alıcı komissiyası tutulacaq.

Qeyd olunur ki, tədbir restavrasiya həvəskarlarını və kolleksiyaçıları bir araya gətirməklə yanaşı, avtomobil tarixinin ən zəngin ailə kolleksiyalarından birinin yeni sahiblərə keçməsini təmin edəcək.

Eltac Zülfüqaroğlu