ABŞ-də uçan taksinin hərbi variantı sınaqdan keçirildi

ABŞ-nin "Joby Aviation" şirkəti ilk dəfə olaraq hərbi məqsədlər üçün yenidən hazırlanmış uçan taksinin hibrid versiyasının uçuşunu həyata keçirib.

Avtosfer.az "Gizmodo" portalına istinadən xəbər verir ki, yeni model turbin-elektrik güc qurğusunu və "SuperPilot" avtonom idarəetmə sistemini özündə birləşdirir.

Elektriklə işləyən Adi "Joby" taksilərindən fərqli olaraq, bu versiya daha ağır yüklər və uzunməsafəli uçuşlar üçün nəzərdə tutulub. Müdafiə şirkəti "L3Harris" ilə əməkdaşlıq çərçivəsində taksiyə müxtəlif sensorlar, müşahidə və rabitə sistemləri, eləcə də "hərbi tapşırıqlar üçün digər avadanlıq" quraşdırılacaq.

Şirkət ABŞ ordusunun avtonom və hibrid uçan aparatlara artan tələbatını qeyd edir. 2026-cı il büdcəsində yeni hava texnologiyalarının hazırlanmasına təxminən 9 milyard dollar ayrılıb.