Avtomobil sürmə təlimində yaş məhdudiyyəti neçədir? – AÇIQLAMA - VİDEO

Sürücülük təlimi zamanı avtomobil idarə edən şəxsin yaşı ilə bağlı məsələlər tez-tez müzakirə olunur. Qanunvericilikdə sürmə təliminin hansı qaydada həyata keçirilməsi ilə bağlı konkret tələblər müəyyən edilib.

Avtosfer.az xəbər verir ki, nəqliyyat eksperti Eldəniz Cəfərov bildirib ki, sürmə təlimi ilə bağlı məsələ “Yol hərəkəti haqqında” qanunun 78-ci maddəsi ilə tənzimlənir. Onun sözlərinə görə, həmin maddədə təlim keçən şəxsin yaşı ilə bağlı ayrıca məhdudiyyət müəyyən edilməyib.

Bu baxımdan 17 yaşlı şəxs təlimçi yanında olmaqla təlim avtomobilini avtomobil yolunda idarə etməyi öyrənə bilər.

Eldəniz Cəfərov qeyd edib ki, burada əsas şərtlərdən biri ilkin sürmə təliminin qapalı ərazidə keçirilməsidir. Şagird ilkin mərhələdə təlimçi tərəfindən qapalı məkanda avtomobil idarə etməyin əsaslarını öyrəndikdən sonra yol şəraitində praktiki sürmə təliminə cəlb oluna bilər.

Ekspert vurğulayıb ki, belə hallarda avtomobilin idarə edilməsi mütləq təlimçinin nəzarəti və iştirakı ilə həyata keçirilməlidir.

Eltac Züflüqaroğlu