Avtomobilin rəngi yanacaq sərfiyyatına təsir edir? – ARAŞDIRMA

Yeni avtomobil alarkən sürücülər adətən mühərrikin gücü, təhlükəsizlik sistemləri və yanacaq sərfiyyatı kimi göstəricilərə diqqət yetirirlər. Lakin aparılan araşdırmalar göstərir ki, avtomobilin rəngi də müəyyən hallarda yanacaq sərfiyyatına dolayı yolla təsir göstərə bilər.

Avtosfer.az xəbər verir ki, tədqiqatların nəticələrinə görə, avtomobilin kuzov rəngi günəş şüalarını udma və ya əks etdirmə səviyyəsinə təsir edir. Tünd rəngli avtomobillər daha çox istilik udduğu üçün salon daha tez qızır, açıq rəngli avtomobillər isə günəş şüalarını daha çox əks etdirərək salonun nisbətən sərin qalmasına kömək edir.

Mütəxəssislərin sözlərinə görə, günəş altında qalan avtomobilin salonunun həddindən artıq isinməsi kondisionerin daha intensiv və daha uzun müddət işləməsinə səbəb olur. Bu isə mühərrikə əlavə yük yaradaraq yanacaq sərfiyyatını müəyyən qədər artıra bilər.

Araşdırmada qeyd olunur ki, istiliyi ən az udan rənglər ağ və boz hesab olunur. Bu rəngli avtomobillərdə kondisionerə olan tələbat daha az olduğundan yanacaq sərfiyyatı baxımından müəyyən üstünlük yaranır. Sarı və qırmızı rənglər orta səviyyədə istilik udduğu halda, mavi, yaşıl, bənövşəyi və qəhvəyi rənglər daha çox istilik toplayır. Ən çox istilik udan rəng isə qara hesab olunur. Günəş şüalarını maksimum dərəcədə cəlb etdiyinə görə qara rəngli avtomobillərin salonu daha sürətlə qızır, kondisioner daha intensiv işləyir və bu da yanacaq sərfiyyatının artmasına səbəb ola bilir.

Bununla belə, ekspertlər vurğulayırlar ki, avtomobilin rəngi yanacaq sərfiyyatına təsir edən əsas amil deyil. Sürüş tərzi, mühərrikin tipi, avtomobilin texniki vəziyyəti, təkərlərin təzyiqi və kondisionerdən istifadə kimi amillər yanacaq sərfiyyatına daha ciddi təsir göstərir. Açıq rəngli avtomobillərin üstünlüyü isə əsasən isti iqlim şəraitində və günəş altında uzun müddət qaldıqda özünü göstərir.

Eltac Zülfüqaroğlu