Avtomobilinə başqa nömrə taxan sürücü 17 min manat cərimələndi - FOTO

Türkiyənin Kayseri şəhərində polisin “saxla” tələbinə əməl etməyərək avtomobillə qaçan sürücü təqib nəticəsində saxlanılıb.

Avtosfer.az xəbər verir ki, hadisə Kayserinin Talas rayonunun Harman məhəlləsi, Məzarlıq küçəsində baş verib. Polis əməkdaşları şübhəli hesab etdikləri şəxsin idarə etdiyi 34 BBK 30 dövlət qeydiyyat nişanlı avtomobili saxlamaq istəyib.

Lakin sürücü polisin “saxla” tələbinə məhəl qoymayaraq avtomobillə ərazidən uzaqlaşıb. Polis əməkdaşlarının başladığı təqib nəticəsində sürücü qısa müddət sonra saxlanılıb.

Yoxlama zamanı avtomobildə başqa nəqliyyat vasitəsinə məxsus dövlət qeydiyyat nişanının olduğu müəyyən edilib. Araşdırma zamanı həmin nömrənin avtomobilin həqiqi dövlət qeydiyyat nişanından son iki rəqəminə görə fərqləndiyi məlum olub.

Hadisə ilə bağlı saxlanılan şəxs barəsində tədbir görülüb və o, saxlanılıb. Yol hərəkəti qanunvericiliyinin müvafiq maddələri əsasında sürücüyə ümumilikdə 496 min türk lirəsi, (təxminən 17 min 200 manat) məbləğində inzibati cərimə tətbiq edilib.

Avtomobil isə yol hərəkətindən kənarlaşdırılaraq duracağa yerləşdirilib.

Eltac Zülfüqaroğlu