Avtomobillərdə illərdir istifadə olunan sistem dəyişdirilir – Geri ötürmədə YENİLİK

Uzun illərdir avtomobillərdə istifadə olunan ənənəvi geri ötürmə sistemi hibrid texnologiyanın inkişafı ilə bəzi lüks və yüksək performanslı modellərdə aradan qalxır.

Avtosfer.az xəbər verir ki, “Ferrari”, “Lamborghini” və “McLaren” kimi istehsalçılar geri hərəkəti təmin etmək üçün mexaniki dişlilər əvəzinə elektrik mühərriklərindən istifadə etməyə başlayıblar.

Elektrik mühərriklərinin fırlanma istiqamətini dəyişə bilməsi transmissiyada ayrıca geri ötürmə mexanizminə ehtiyacı aradan qaldırır. Bu isə həm çəkinin azaldılmasına, həm də transmissiyada əlavə yerə qənaət edilməsinə imkan verir.

“Ferrari SF90 Stradale”, “McLaren Artura”, “Aston Martin Valhalla” və “Lamborghini Revuelto” bu sistemdən istifadə edən diqqətçəkən modellər sırasındadır. Sözügedən avtomobillərdə geri hərəkət elektrik mühərrikləri vasitəsilə həyata keçirilir.

Xüsusilə hibrid superavtomobillərdə geniş yayılmağa başlayan bu texnologiya benzin mühərriki işləməsə belə avtomobilin geri hərəkət etməsinə imkan verir. “Lamborghini Revuelto” da bu sistemdən istifadə edən modellərdən biridir.

1000 at gücündən çox gücə malik “Revuelto” 0-dan 100 km/saat sürətə 2,5 saniyəyə çatır və maksimal sürəti 350 km/saatı ötür. Avtomobil 3,8 kVt/saatlıq batareyası sayəsində qısa məsafələrdə yalnız elektrik enerjisi ilə də hərəkət edə bilir.

Ənənəvi geri ötürmənin ləğvi hazırda əsasən bahalı hibrid superavtomobillərdə tətbiq olunsa da, elektrik texnologiyasının inkişafı ilə bu dəyişimin gələcəkdə avtomobil sənayesinin daha geniş seqmentlərinə yayılacağı gözlənilir.

Eltac Zülfüqaroğlu