Bu avtomobildən cəmi 30 ədəd istehsal olunacaq – SƏBƏBLƏR

Los-Ancelesdə yerləşən “Czinger” şirkəti 21C modelinin üstü açıq versiyası olan 21C Spyder-i təqdim edib. 1 250 at gücünə malik hibrid mühərrik sistemi ilə təchiz edilən yeni superkarın maksimal sürəti 330 km/saatdır. Modeldən cəmi 30 ədəd istehsal olunacaq və avtomobilin başlanğıc qiyməti 2,75 milyon dollar təşkil edəcək.

Avtosfer.az xəbər verir ki, “Czinger” 21C Spyder-i Los-Ancelesdəki istehsal müəssisəsində əl ilə hazırlayacaq. Model markanın 21C ailəsinin üçüncü versiyasıdır və əsas xüsusiyyətləri arasında üstü açıq kuzov, yüksək performanslı hibrid güc qurğusu və yeni əyləc texnologiyası yer alır.

Avtomobildə “BrakeNode” adlı yeni əyləc sistemi tətbiq edilib. Bu texnologiya asqı dayağını, əyləc supportunu və hidravlik maye kanallarını vahid konstruksiyada birləşdirir. Sistemin əsas məqsədi yaylanmayan kütləni azaltmaq və əyləcləmə dəqiqliyini artırmaqdır.

İstehsalçının məlumatına görə, “BrakeNode” ənənəvi sistemlərlə müqayisədə əyləc məsafəsini 15 faizə qədər qısalda bilir. Sistem hər təkərdə təxminən 0,7 kiloqram çəkiyə qənaət etməyə imkan verir. Titandan hazırlanmış porşenlər isə hidravlik mayenin temperaturunun 15 faiz daha aşağı səviyyədə saxlanmasına kömək edir.

“Czinger 21C Spyder” güc qurğusunu 21C HDF modeli ilə bölüşür. Avtomobil 2,88 litrlik iki turbokompressorlu V8 mühərrik, ön oxda yerləşdirilmiş iki elektrik mühərriki və arxa oxda quraşdırılmış mühərrik-generator qurğusundan ibarət hibrid sistemlə təchiz olunub.

Güc qurğusunun ümumi hasilatı 1 250 at gücü, fırlanma anı isə 937 Nm təşkil edir. Güc 7 pilləli, bir muftalı transaks transmissiya vasitəsilə təkərlərə ötürülür.

Zavod göstəricilərinə əsasən, avtomobil 0-dan 96 km/saata cəmi 1,9 saniyəyə sürətlənir. Model 402 metrlik məsafəni 8,7 saniyəyə qət edir. Maksimal sürət isə 330 km/saatdır.

Yüksək sürətlərdə avtomobilin yola daha möhkəm yapışmasını təmin etmək üçün aerodinamik kuzov və 76 düymlük “qu quşu boynu” tipli arxa qanad hazırlanıb. Tavan çıxarıldıqda avtomobil 240 km/saat sürətlə hərəkət zamanı 1 470 kiloqram, tavan quraşdırıldıqda isə 1 540 kiloqram yerəbasma qüvvəsi yaradır.

Avtomobilin yaratdığı ümumi aerodinamik yerəbasma qüvvəsinin təxminən 60 faizi birbaşa arxa oxa tətbiq olunur. Bu xüsusiyyət yüksək sürətlə hərəkət zamanı avtomobilin sabitliyinin artırılmasına xidmət edir.

“Czinger 21C Spyder”in istehsalı məhdud sayda həyata keçiriləcək. Şirkət modeldən cəmi 30 ədəd buraxmağı planlaşdırır və avtomobilin başlanğıc qiyməti 2,75 milyon dollar müəyyən edilib.

Eltac Zülfüqaroğlu