Bu ölkədə yol polisi əlil sürücünü şərləməyə çalışdı; ifşa EDİLDİ – VİDEO

ABŞ-nin Florida ştatında qeyri-adi yol polisi insidenti ictimai diqqət çəkib.

Avtosfer.az xəbər verir ki, sosial şəbəkələrdə yayılan məlumata görə, sağ əli olmayan qadın sürücüyə avtomobil idarə edərkən telefon istifadə etdiyi iddiası ilə 116 ABŞ dolları (təxminən 198 AZN) məbləğində cərimə yazılıb.

Qadının vəziyyətini izah edərək, fiziki məhdudiyyəti səbəbindən irəli sürülən ittihamın mümkün olmadığını polis əməkdaşlarına bildirməyə çalışdığı qeyd olunur. Həmin anlar qısa zamanda sosial şəbəkələrdə yayılaraq böyük rezonans doğurub.

Hüquqşünasların açıqlamasına görə, cərimə zamanı mövcud qanunun tətbiqində yanlışlıq ola bilər. Bildirilir ki, Florida ştatının yol hərəkəti qaydalarına əsasən, müəyyən zonalar istisna olmaqla, sürücünün sükan arxasında telefonu əlində tutması hər zaman avtomatik qanun pozuntusu sayılmır.

Hadisənin ictimai rezonans doğurmasından sonra mübahisəli cərimə protokolunun məhkəmə tərəfindən ləğv edildiyi bildirilib. Məsələ sosial mediada geniş müzakirələrə səbəb olub.

Eltac Zülfüqaroğlu