Dinozavr skeleti rekord qiymətə satıldı

Sotbi hərrac evində daha bir unikal satış həyata keçirilib. Nyu-Yorkda reallaşan satışa 70 milyon il əvvəl yaşamış dinozavrın skeleti çıxarılıb. Bioloqlar bu cür satışlardan narazıdır.  

Avtosfer.az xəbər verir ki, nadir skelet 50,1 milyon dollara satılıb. Bu, hərraclar tarixində ən baha qiymətə satılan qədim canlı qalığıdır. Təqribən 70 milyon il əvvəl yaşamış teropoda aid skelet dünyada ən yaxşı qalanlardan hesab edilir. 2021-ci ildə Cənubi Dakota ştatında tapılmış fosilin 183 sümüyü var. 11,6 metrlik skeletin tamlığı 63 faizdir. Alıcının adı açıqlanmır. Bioloqlar bu cür hərracları tənqid etsələr də, Amerika Birləşmiş Ştatlarında belə satışlar leqaldır. 

Hərrac evinin nümayəndəsi Kassandra Hatton deyir: “ABŞ yeganə ölkədir ki, burada fosillərin xüsusi mülkiyyətdə olmasına icazə verilir. Əgər siz mülkiyyətinizdə olan torpaqda fosil tapmısınızsa, onu sata bilərsiniz. Bir sözlə, siz dinozavr axtarırsınızsa, onu ala biləcəyiniz yeganə ölkə buradır”.

2024-cü ildə hərrac evində satışa çıxarılan steqozavrı tanınmış iş adamı 44,6 milyon dollara alaraq Nyu-York Təbiət Tarixi Muzeyinə hədiyyə edib. Bu məbləğ də həmin dövr üçün rekord idi.

Vüqar