Elektromobil sərnişinlərində nə üçün ürəkbulanma yaranır? - FOTO

Elektromobildən istifadə edənlər arasında ürəkbulanmadan şikayət edənlərin sayı durmadan artır. Xüsusən də sərnişinlər arasında. Bəs səbəb nədir?

Avtosfer.az xəbər verir ki, məsələ ilə bağlı Avropada araşdırma aparılıb. Məlum olub ki, səbəb sensor hisslərin pozulmasıdır.

Avtomobildə hərəkət zamanı sürücü və sərnişinlərdə narahatlıq yaranması – kinetoz – xəstəliyinin yaşı elə avtomobilin yaşı qədərdir. Bu hal daxili qulaq, gözlər və bədənin qəbul etdiyi xarici siqnallar arasında uyğunsuzluq yarandıqda baş verir. 

Daxiliyanma mühərrikli avtomobildə yaranan səs, vibrasiya və ötürmələrin təkanları nəticəsində orqanizm hərəkətdə olduğunu başa düşür və bir növ rahatlıq yaranır (əlbəttə, müəyyən hədd daxilində). Lakin elektromobildə sürətlənmə daha rəvan, çevik və səssiz olduğundan beyin siqnalları qavramağa çətinlik çəkir. Nəticədə orientasiya pozulur.

Tədqiqat göstərir ki, bu halın yaranmasına səbəb insan beyninin müvafiq şəraitlə bağlı təcrübəsinin azlığıdır. Bəşəriyyət 100 ildən çoxdur ənənəvi avtomobilə öyrəşib. 

Digər tərəfdən, elektromobillərə xas vibrasiya da diskomfort hissini artırır. Xüsusən də arxa oturacaqdakı sərnişinlərdə. Elektromobili təcrübəsiz sürücü idarə etdikdə, kəskin tormozlama və sürətlənmə zamanı isə sərnişinlərin vəziyyəti daha dözülməz olur.

Vüqar Yaşaroğlu