Ev və ofis şəraitində işləmək xəstəliklərin artmasına səbəb olur – İNFEKSİONİSTDƏN ƏHALİYƏ XƏBƏRDARLIQ

Qış aylarında müxtəlif xəstəliklərin yayılması halları tez-tez baş verir. İnsanlar qrip, bronxit, faringit və soyuqdəymə kimi xəstəliklərə tutulur. Soyuq aylarda xəstəliklərə yoluxma riskini artıran müxtəlif amillər mövcuddur. Məlumdur ki, qrip törədən viruslar quru və soyuq havalarda daha asan çoxalır.  
Bəs qış aylarında havaların soyuq keçməməsi və qarın yağmaması infeksion xəstəliklərin artmasına səbəb ola bilər?

Mövzu ilə bağlı pediatr-infeksionist Aytən Ziyadova Avtosfer.az-a açıqlamasında bildirib ki, ilk növbədə, iqlim dəyişiklikləri mikrobların yayılmasına şərait yaradır:
“İsti və quru hava mikrobların daha asan yayılmasına səbəb olur. Bununla yanaşı, insanların daha az açıq havada olub daha çox qapalı məkanlarda toplanması infeksiyaların yayılmasını sürətləndirə bilər.

Qar yağmadığı zaman ətraf mühitdə suyun təbii dövrü pozulur, bu isə sanitariya problemlərinə və mikrobların uzun müddət canlı qalmasına yol açır. Həmçinin daha yumuşaq və sabit hava şəraiti bəzi infeksiyaların yayılması üçün əlverişli şərait yaradır.

Qış aylarında insanların evdə və ofislərdə daha çox vaxt keçirməsi də virusların və bakteriyaların yayılmasına səbəb olur”.

Həkim sonda vurğulayıb ki, bu faktorlar infeksion xəstəliklərin yayılmasına şərait yaradır və onların artmasına gətirib çıxarır:

“Xüsusilə bu qeyri-adi hava şəraitində insanlar şəxsi gigiyenaya diqqət etməli, əllərin təmizliyinə və müntəzəm havalandırmaya önəm verməlidirlər”.

Eltac Zülfüqaroğlu