Hansı avtomobil markasının sürücüləri daha yüksək IQ-yə malikdir? – ARAŞDIRMA

Avtomobil markası ilə sürücülərin intellekt səviyyəsi arasında əlaqənin olub-olmaması ilə bağlı Böyük Britaniyada aparılan araşdırma maraqlı nəticələr ortaya qoyub.

Avtosfer.az xəbər verir ki, “Freebets” platformasının Böyük Britaniya üzrə 2 min sürücünün iştirakı ilə keçirdiyi sorğuda iştirakçılar əvvəlcə IQ testindən keçirilib, daha sonra isə istifadə etdikləri avtomobil markaları müəyyənləşdirilib. Əldə olunan nəticələr əsasında markalar üzrə orta IQ göstəriciləri hesablanıb.

Araşdırmanın nəticələrinə görə, “Volvo” sürücüləri orta hesabla 115 IQ balı toplayaraq siyahıda ilk yeri tutublar. Bu göstərici dünya üzrə qəbul edilən orta IQ səviyyəsindən xeyli yüksək hesab olunur.

“Freebets”in sözçüsü Tim Aqnyu bildirib ki, cəmiyyətdə “Volvo” sürücülərinin məntiqli və təmkinli insanlar olması ilə bağlı uzun illərdir formalaşmış fikir mövcuddur. Onun sözlərinə görə, sorğunun nəticələri bu stereotipi müəyyən qədər təsdiqləyir.

Araşdırmada “Skoda” sürücüləri orta hesabla 113 bal toplayaraq ikinci yerdə qərarlaşıblar. “Tesla” və “Toyota” sürücülərinin hər biri 112 bal, “Honda” sürücüləri isə 111 bal nəticə göstərərək ilk sıralarda yer alıblar.

Digər tərəfdən, araşdırmada ən aşağı orta IQ göstəricisi “BMW” və “MINI” sürücülərində qeydə alınıb. Hər iki markanın istifadəçiləri orta hesabla 87 bal toplayıblar. “Land Rover”, “Vauxhall” və “Fiat” sürücüləri də orta göstəriciyə görə siyahının son pillələrində yer alıblar.

Bununla belə, mütəxəssislər araşdırmanın nəticələrinə ehtiyatla yanaşmağın vacib olduğunu bildirirlər. Onların fikrincə, cəmi 2 min nəfərin iştirak etdiyi sorğunun nəticələrini bütün sürücülərə şamil etmək düzgün deyil. Ekspertlər vurğulayırlar ki, insanın idarə etdiyi avtomobil markası ilə onun intellekt səviyyəsi arasında birbaşa və elmi cəhətdən tam sübut olunmuş əlaqənin mövcud olduğunu söyləmək mümkün deyil.

Qeyd edək ki, araşdırmanın nəticələri Böyük Britaniyanın “Daily Star” nəşrində dərc olunduqdan sonra avtomobil həvəskarları və sosial şəbəkə istifadəçiləri arasında geniş müzakirələrə səbəb olub.

Eltac Zülfüqaroğlu