Həbsxanadan filmdəkinə bənzər qaçış

Almaniyanın Duysburq şəhərindəki penitensiar müəssisədən qaçış dünya mediasının diqqət mərkəzindədir. 

Avtosfer.az xəbər verir ki, 35 yaşlı Serbiya vətəndaşı həbsxananın üçüncü mərtəbəsindəki kameranın dəmir barmaqlığını kəsərək xilas olub. Qaçan dustağı tapmaq mümkün olmayıb. Prokurorluq məsələ ilə bağlı həbsxana əməkdaşlarını dindirib.

Qaçan şəxs fevralda 2 şəhərdə çox sayda qızıl və 200 min avro nağd pul oğurladığı üçün 6 il azadlıqdan məhrum edilib. Bundan başqa, Serbiya və Fransa məhkəmələri də onun haqqında qiyabi hökm çıxarıb.

Müstəntiqlərə ifadəsində saatdarlardan biri binanın damında bir nəfəri görsə də, şübhələnmədiyini bildirib. İlkin ehtimala görə, dustaq binanın damına çıxaraq ordan yağış borusu vasitəsi ilə qaçıb.

Almaniyada belə qaçışlar nadir hallarda – təxminən 10 ildə bir dəfə baş verir. Dustaqlar adətən müvəqqəti olaraq evə buraxılarkən penitensiar müəssisəyə qayıtmaqdan yayınırlar. Onları isə uzağı 3 gün ərzində aşkar edərək həbsxanaya qaytarmaq mümkün olur.

Vüqar