Keçən il “Bolt”un çatdırdığı ən bahalı sifariş 647 avroluq ətir olub – AÇIQLAMA - VİDEO

Pandemiyadan sonra bütün dünyada çatdırılma xidmətləri dəb halını aldı. Ölkəmizdə də daha əvvəl az-az da olsa çatdırılma xidmətindən istifadəyə rastlansa da, post-pandemiya dövründə yeni şirkətlər ortaya çıxdı. Kəskin şəkildə çatdırılma xidmətindəki yüksəliş yeni sahələrin inkişafına səbəb oldu. Lakin ölkəmizdə bir şirkət var ki, o öz çatdırılma xidmətini hələ pandemiyadan əvvəl təklif edirdi.

Avtosfer.az xəbər verir ki, “Bolt”un “Bolt Food” çatdırılma xidməti öz kuryer bazası ilə hələ 2019-cu ildən insanların sifarişlərini yerinə yetirirdi. “Bolt” şirkəti Azərbaycanda 2025-ci il üzrə mobillik və çatdırılma rekordlarını açıqlayıb. Bununla bağlı nəqliyyat eksperti Elməddin Muradlı Avtosfer.az-ın sosial şəbəkə hesablarında canlı yayım zamanı məlumat verib. O qeyd edib ki, il ərzində “Bolt”un taksi, mikromobillik, “Bolt Food” və “Bolt for Business” xidmətləri istifadəçilərin gündəlik hərəkət və sifariş vərdişlərini əks etdirən məlumatlarla yadda qalıb:

“Azərbaycanda “Bolt” taksi xidmətində həftənin ən aktiv günü şənbə olub. Gedişlərin pik saatları səhər 07:00–09:00, günorta 12:00–14:00 və axşam 17:00–19:00 aralığında qeydə alınıb.

Ən çox seçilən götürülmə nöqtələri Bakı Beynəlxalq Avtovağzal Kompleksi, Sədərək Ticarət Mərkəzi və “20 Yanvar” metrosu və avtobus dayanacaqları olub.

2025-ci ildə bir istifadəçi tərəfindən qət edilən ən uzun məsafə 205 km təşkil edib. Ümumilikdə ən populyar gediş kateqoriyası “Bolt” olub. Dayanıqlı mobilliyə marağın artdığını göstərən göstəricilərdən biri kimi, EV (elektrik avtomobillər) kateqoriyası üzrə son 6 ayda 102 847 gediş həyata keçirilib.

“Bolt Food” üzrə məlumatlara əsasən, ən çox sifariş verilən gün cümə olub. İlin ən çox sifariş edilən məhsulları sırasında fri kartof, lavaşda şaurma və I-Twister yer alıb.

2025-ci ildə Azərbaycanda ən böyük “Bolt Food” sifarişi Bakıda qeydə alınıb — 67 məhsuldan ibarət ərzaq sifarişi. Ən bahalı sifariş isə yenə Bakıda edilib və 845 avro dəyərində ətir məhsulunu əhatə edib.

Eyni zamanda, 2025-ci ildə Azərbaycanda “Bolt Accelerator” proqramı həyata keçirilib və proqramın qalibi Bolt Food platformasında fəaliyyət göstərən kuryer olub. Bu fakt Bolt-un yerli icmaların iqtisadi imkanlarının genişləndirilməsinə yönəlmiş təşəbbüslərini əks etdirir.

2025-ci ildə Bolt-un mikromobillik xidmətləri Azərbaycanda, xüsusilə Bakıda, qısa məsafələr üçün alternativ hərəkət vasitəsi kimi istifadə olunub.

İl ərzində bir istifadəçi tərəfindən qeydə alınan rekord skuter gediş sayı 1 016 olub. Skuterlərdən istifadə üzrə ən populyar gün 19 sentyabr tarixində qeydə alınıb. Bu tarix Bakıda keçirilən “Avtomobilsiz gün” (Car Free Day), AYNA ilə birgə təşkil olunan yol təhlükəsizliyi tədbirləri, eləcə də 19–21 sentyabr tarixlərini əhatə edən “Formula 1” yarışları dövründə skuter istifadəsinin pik həddə çatması ilə üst-üstə düşüb.

2025-ci ildə “Bolt Business” Azərbaycanda fəaliyyət göstərən şirkətlər üçün korporativ nəqliyyatın idarə olunmasında istifadə edilib. Gediş həcminə görə ən aktiv şəhər Bakı olub.

“Bolt Business” üzrə ən aktiv günlər çərşənbə axşamı və cümə, pik istifadə saatları isə 12:00–16:00 və gecə 01:00–03:00 aralığında qeydə alınıb.

“Bolt” şirkətinin nümayəndəsinin sözlərinə görə 2025-ci il ərzində toplanan məlumatlar “Bolt”un istifadəçilərin gündəlik mobillik və çatdırılma ehtiyaclarını necə qarşıladığını aydın şəkildə göstərir. Məqsədimiz şəhər mühitində daha rahat, əlçatan və dayanıqlı həllər təqdim etməkdir”.

Səfər