Körpülərin birləşən yerindəki boşluqlar nə işə yarayır? - Ekspert AÇIQLADI

Nəqliyyat eksperti Rauf Ağamirzəyev körpülərdə quraşdırılan deformasiya tikişlərinin əhəmiyyəti barədə məlumat verib.

Avtosfer.az xəbər verir ki, ekspertin sözlərinə görə, sürücülərin körpülərin üzərində tez-tez rast gəldiyi xüsusi keçid hissələri deformasiya tikişləri adlanır və bu elementlər körpü konstruksiyasının təhlükəsiz və uzunömürlü istismarında mühüm rol oynayır.

Rauf Ağamirzəyev bildirib ki, deformasiya tikişləri körpü konstruksiyasının temperatur dəyişiklikləri, nəqliyyat vasitələrinin yaratdığı yüklər, külək və digər xarici təsirlər nəticəsində meydana gələn hərəkətləri kompensasiya etmək üçün quraşdırılır.

Havanın temperaturu yüksəldikdə körpü konstruksiyası genişlənir, temperatur aşağı düşdükdə isə yığılır. Deformasiya tikişləri bu dəyişiklikləri qəbul edərək konstruksiyada əlavə gərginliyin yaranmasının qarşısını alır.

Belə elementlər olmasa, körpünün yol örtüyündə çatlar yarana, konstruktiv hissələr zədələnə və istismar zamanı müxtəlif problemlər meydana çıxa bilər.

Deformasiya tikişləri körpünün təhlükəsizliyinin artırılmasına, konstruksiyanın dayanıqlılığının qorunmasına və yol örtüyünün vaxtından əvvəl sıradan çıxmasının qarşısının alınmasına xidmət edir. Bundan əlavə, bu sistemlər nəqliyyat vasitələrinin daha rahat hərəkət etməsinə şərait yaradır və körpünün istismar müddətinin uzadılmasına kömək edir.

Ekspertin fikrincə, ölçücə kiçik görünməsinə baxmayaraq, deformasiya tikişləri müasir körpü infrastrukturunun vacib mühəndislik elementlərindən biridir və onların saz vəziyyətdə saxlanılması körpülərin etibarlı istismarı üçün xüsusi əhəmiyyət daşıyır.

Eltac Zülfüqaroğlu