Mexaniki avtomobil sürənlərin yaddaşı daha güclü olur? – ARAŞDIRMA

Mexaniki ötürmələr qutusu ilə təchiz edilmiş avtomobil idarə edən sürücülərin yaddaş və diqqət tələb edən tapşırıqlarda avtomatik transmissiyalı avtomobil idarə edənlərlə müqayisədə daha yüksək nəticələr göstərdiyi müəyyən edilib.

Avtosfer.az xəbər verir ki, bu nəticə sürücülərin avtomobili idarə edərkən yerinə yetirdikləri hərəkətlərin beyin fəaliyyətinə təsirini araşdıran tədqiqatlardan birində ortaya çıxıb.

Mütəxəssislərin fikrincə, mexaniki transmissiyalı avtomobil idarə edən sürücülər sürətlər qutusunu mütəmadi dəyişməli, muftadan (ilişmə pedalından) istifadə etməli və mühərrikin dövrlərini daim nəzarətdə saxlamalı olurlar. Bu isə sürücüdən daha yüksək diqqət, koordinasiya və eyni anda bir neçə əməliyyatı yerinə yetirmək bacarığı tələb edir.

Məhz bu səbəbdən mexaniki avtomobil idarə edən şəxslər yaddaş, diqqətin cəmlənməsi və qərarvermə ilə bağlı testlərdə daha uğurlu nəticələr nümayiş etdiriblər.

Bununla belə, tədqiqat müəllifləri vurğulayırlar ki, bu nəticələr avtomatik transmissiyalı avtomobillərin daha təhlükəli və ya sürücülərinin daha zəif bacarıqlara malik olması anlamına gəlmir. Avtomatik transmissiya sürücünün fiziki yükünü azaldır və onun diqqətini daha çox yol şəraitinə yönəltməsinə imkan verir.

Ekspertlər bildirirlər ki, istər mexaniki, istərsə də avtomatik transmissiyalı avtomobil idarə edən sürücülər üçün əsas amil yol hərəkəti qaydalarına riayət etmək, diqqəti yayındıran amillərdən uzaq durmaq və təhlükəsiz sürücülük vərdişlərini qorumaqdır.

Araşdırmanın nəticələri bir daha göstərir ki, avtomobil idarəetmə tərzi sürücünün müəyyən idrak bacarıqlarına təsir göstərə bilsə də, təhlükəsizliyin əsas şərti transmissiya növü deyil, sükan arxasında məsuliyyətli davranışdır.

Eltac Zülfüqaroğlu