Özbəkistan məktəblərində telefonla bağlı sərt qadağalar

Özbəkistanda yeni tədris ilində məktəblərin ətrafında hərəkətin təşkili ilə bağlı ciddi işlər görüldü. Hərəkətin təşkilini bizdəki kimi orada da Dövlət Yol Polisi həyata keçirdi. Təhsil Nazirliyi isə yeni əmrlə məktəblərə telefon qadağası tətbiq etdi.

Avtosfer.az xəbər verir ki, sentyabrın 2-də başlayan tədris ilindən orta məktəblərə şortiklə, futbolka ilə, şəpiklə və açıq-saçıq geyimlə gəlmək qadağan edilir. Həmçinin, məktəbdə ad günləri və qeyri-rəsmi bayramların keçirilməsi də qdağan olunub.

Ən ciddi qadağalar isə mobil telefonla bağlıdır. Məktəbə telefon, qulaqcıq və qacet gətirmək, dərsdə telefonla çəkiliş aparmaq, mobil telefondan tədrisdə istifadə qadağandır. Sosial şəbəkədə müəllimin və ya məktəbin nüfuzunu ləkələyən paylaşımlar etmək, audio və videomateriallar yaymaq da qadağandır.

Şagird məktəbə telefon gətirməməli, yaxud, bunu məktəbin girişində mühafizətə təqdim etməlidir. Əks təqdirdə valiedyni 4,12 milyon sum  (təxminən 1400 AZN) cərimə gözləyir.
Telefonu təhvil verməyən şagird profilaktik uçota alınır, valideynə isə cərimə tətbiq edilir. 

Bir neçə il əvvəl məktəblilərə saçlarını rəngləmək, tatu və pirsinq etmək, saqqal saxlamaq, dərsdə lüzumsuz danışmaq, səs salmaq qadağan edilmişdi. Davranış qaydalarına əməl etməyən şagirdlərin məsələsi yerli özünüidarəetmə orqanlarında (bələdiyyə) müzakirə edilib müvafiq qərar verilir. 

Şagirdlərin üzrsüz dərs buraxmasına görə də valideyn cərimələnə bilər.

Əslində bu qaydalar Özbəkistan üçün yenilik olsa da, dünyada ilk deyil. Məsələn, Fransada islah olunmayan şagirdlə bağlı məktəblər birinci dəfə bələdiyyəyə, bu da səmərə verməsə polisə şikayət edə bilərlər.

Vüqar Yaşaroğlu