Ruslar yerli detalla təyyarə yığdılar, uça bilmədi

Rusiyada yerli təyyarə istehsalı və “idxalın əvəzlənməsi” kampaniyası tam sürətlə davam etsə də, ciddi irəliləyiş yoxdur. 

Avtosfer.az xəbər verir ki, bu dəfə rusiyalı ekspertlər məşhur MS-21 təyyarəsi barədə maraqlı faktları açıqlayıblar.  Məlum olub ki, təyyarənin Rusiyada istehsal olunmuş plastik məmulatlar və interyer detalları ilə yığılması nəticəsində laynerin kütləsi nəzərdə tutulandan 6 ton çox olub. Bu kütlədə təyyarəni isə mövcud mühərriklər qaldıra bilməyəcək. 

Nəzərdə tutulan uçuş məsafəsi isə 6000 kilometrdən 2800 kilometrə enib. Başqa sözlə desək, Peterburqdan Kamçatkaya uçmaq üçün azı 3 dəfə yanacaq doldurmaq üçün texniki eniş edilməlidir.   

Məsələnin həll yolu kimi mühəndislər füzelyajı gödəltmək istəyiblər. bu zaman da oturacaq sayı 200-dən 140-a düşəcək və təyyarə ümumiyyətlə rentabelli olmayacaq. 

İndi mühəndislər bu 6 ton əlavə yükü necə yüngülləşdirmək barədə baş sındırırlar. Daha böyük çətinlik isə elektronikanın əvəzlənməsidir ki, bunu da müstəqil ekspertlər real saymırlar. 

Qeyd edək ki, Ukrayna müharibəsi başladıqdan sonra Airbus, Boeing və Embraer Rusiya ilə əməkdaşlığı dayandırıb. Çin isə qərbli istehsalçıların hazırladığı mühərrikləri istehsal etmək gücündə deyil. Bir il əvvəl isə Çin də müttəfiqinin təyyarə layihəsindən çəkilib.

Vüqar