Saxta fotolarla sərnişinlərdən pul alan taksi sürücüsü SAXLANILDI

Taksi sürücüsünün sərnişinlərdən haqsız ödəniş almaq üçün hazırladığı plan ifşa olunub.

Avtosfer.az xəbər verir ki, ABŞ-də taksi sürücüsü avtomobilin arxa oturacağında guya içki töküldüyünü və salonun çirkləndiyini göstərən saxta fotoları “Lyft” platformasına təqdim edərək sərnişinlərin bank kartlarından 75 dollar məbləğində əlavə ödəniş tutulmasına nail olub.

Lakin sürücünün hazırladığı saxta sübutlardan birində süni intellekt vasitəsilə yaradıldığını göstərən loqo görünüb. Diqqətli sərnişin bunu fərq edərək platformaya şikayət ünvanlayıb.

Araşdırma zamanı fotoların saxta olduğu müəyyən edilib və sürücünün eyni üsulla bir neçə sərnişindən haqsız ödəniş aldığı üzə çıxıb.

Nəticədə, qaydaları pozan sürücü “Lyft” platformasından daimi olaraq uzaqlaşdırılıb. Şirkət isə haqsız şəkildə tutulan bütün vəsaitin müştərilərə geri qaytarıldığını açıqlayıb.

Eltac Zülfüqaroğlu