Turistin “suvenir”i  aeroportda terminalın bağlanmasına səbəb olub

İyirmi dörd yaşlı amerikalı turistin Avstriyada tətil zamanı tapdığı partlayıcı qumbara Vyana beynəlxalq hava limanında böyük həyəcan yaradıb. Avtosfer.az “Azərtac”a istinadən xəbər verir ki, Alp dağlarında gəzinti zamanı tapdığı İkinci Dünya müharibəsinə aid qumbaranı suvenir kimi vətəninə aparmağı düşünən turist hava limanında təhlükəsizlik əməkdaşlarına gərgin anlar yaşadıb. İkinci Dünya müharibəsinə aid relikti özü ilə aparmaq üçün rəsmi şəkildə hava limanı gömrüyünə müraciət edən ABŞ vətəndaşı polisin irimiqyaslı əməliyyatına səbəb olub. Partlamamış qumbaranı görən aeroport əməkdaşları dərhal polisə məlumat veriblər və aeroportun həmin terminalı bir neçə saat müddətinə bağlanıb. Polisin nəzarəti altında İkinci Dünya müharibəsinə aid relikt xüsusi poliqonda partladılıb.

Gənc turist qız 30 santimetr uzunluğunda qumbaranı tapdıqdan sonra çantası çirklənməsin deyə qumbaranı otel otağında yuyub təmizləməyi də unutmayıbmış.

Turist “suvenir”i özü ilə apara bilməsə də, vətəninə əliboş dönməyib. Avstriya hüquq mühafizə orqanları ona ictimai asayişə ciddi təhlükə yaradan əməlinə görə bir neçə min avro dəyərində cəza “hədiyyə” ediblər.